طريقة عمل مكرونة بالبشاميل،باسهل طريقة و مفيش اطعم منها
احلى مكرونة بالشاميل هتعمليها من ايدك انتى وبس وطعمها بجد حكاية كل الى جربها واكلها عجبته جدا هنبدأ نشوف المقادير والطريقة ⇩
المقادير:
كيلو مكرونة اقلام (مكرونة فرن)
نص كيلو لحمة مفرومة
كيلو لبن
٤ ملاعق دقيق
٤ ملاعق زبذة
تعصيج اللحمة:
في حلة علي النار هنحط فيها معلقتين زبدة ونقطع بصلة كبيرة ناعم ونقلبهم كويس ولما تذبل البصلة نضيف اللحمة المفرومة ونقلبهم مع بعض كويس وبعدين نضيف عليهم البهارات دي(نص معلقة ملح - نص معلقة فلفل اسود - نص معلقة بهارات مشكلة - ربع معلقة من البابريكا و القرفة و كمان الحبهان المطحون).
ونقلبهم مع بعض ونضيف كمان عليهم معلقتين صلصة طماطم ونقلب وممكن نضيف فلفل الوان بيدي طعم وريحة جميلة للحمة ونسيبهم مع بعض لمدة ثلث ساعة هتكون اللحمة اتعصجت وبقت زي الفل والوصفة دي تنفع حشو لاي صنف بيتحشى لحمة مفرومة.
الطريقة:
- سلق المكرونة في ميه بملح ومعلقة زيت لما تستوي كويس بتاخد حوالي ربع ساعة وبعد كده نصفيها.
- البشاميل، في حلة علي النار هنحط ٤ ملاعق زبدة ومعاهم ٤ ملاعق دقيق ونقلبهم بمضرب سلك عشان الخليط يكون ناعم وخالي من اى كتل لمدة دقيقتين عشان الدقيق يستوي مع الزبدة وريحته تطلع ودا اللي بيفرق بشاميل عن التاني، ونضيف بعد كده اللبن ونقلب بإستمرار والقوام البشاميل هيتقل لما يغلي ويبقى كده استوى وبقى تمام ولما يهدى خالص نضيف بيضة ورشة فلفل اسود عشان ريحة البيضة ونقلبهم مع البشاميل.
- اللحمة اتعصجت وبقت تمام في صينية هنحط في القاع معلقتين بشاميل ونفردهم فيها كويس هناخد كمية من البشاميل نضيفها على المكرونة ونقلبهم مع بعض وناخد نصفها نفردها فى الصينية ونوزعها فيها وبعد كده نضيف اللحمة المتعصجة ونفردها كويس وبعدين نضيف النص التانى من المكرونة وعلى الوش هنضيف البشاميل ونوزعه كويس ونضيف جبنة رومي او موتزريلا مبشورة لو متاح عندك بيدى طعم ولون تحفة للمكرونة وبالف هنا.
- ان شاء الله تجربوها وتعجبكم بطريقتى.
تعليقات
إرسال تعليق